Swatiche Shabdamoti

स्पर्धेसाठी आला श्रावण आला श्रावण आला श्रावण  सृष्टीचे हे रूप नवे रिमझिम झरणा-या मेघांनाही  इंद्रधनुचे रंग हवे भोळीभाबडी आई करीते व्रतवैकल्ये अन्  उपवास बाळासाठी सौख्य, संपदा अन् शारदेचा घडो वास मंदिरेही फुलून जाती होई भक्तांची दाटी प्रसन्न होऊनी मनोकामना पूर्ण करी मग जगजेठी सणवारांची रेलचेल अन् पक्वान्नांची भरली ताटे तृप्त मनाने भोजन करीता आनंदची की ह्रदयी दाटे रक्षाबंधन, दहीहंडी अन् मंगळागौरीचे ते खेळ ह्या सा-यांसह सुरेख जमतो श्रावण महिन्याचा तो मेळ ©स्वाती शृंगारपुरे बोरीवली, मुंबई 📞 ८६९२८९३९८४

*स्वातीचे शब्दमोती* *आठवणीतला गणेशोत्सव*      गणेशोत्सव म्हंटलं की अर्थातच सर्वत्र उत्साहाचं,चैतन्याचं वातावरण ! बदलत्या काळानुसार गणेशोत्सवाचे स्वरूप जरी बदलत गेले तरी उत्साह व भक्तिभाव आजही कायम आहे.      आमच्या बालपणीही गणेशोत्सव म्हणजे फार मोठी पर्वणी असे. श्रावण मध्यावर आला की घरोघरी गणेशोत्सवाची तयारी सुरू होई. बाजारात सर्व वस्तू उपलब्ध असल्या तरीही 'रेडीमेड' ची पद्धत त्याकाळी प्रचलित नव्हती. सर्वप्रथम घरातील स्त्रीया मोदकांची तयारी करीत असत. बेगमीच्या दिवसांत घरात साठवण करून ठेवलेला सुगंधी तांदूळ बाहेर काढला जाई. तांदूळ स्वच्छ धुवून,वाळवून घरीच जात्यावर दळला जाई. तांदूळ दळताना त्याचा एक प्रसन्न सुगंध घरात दरवळत असे. गणेशाच्या आगमनाची वर्दीच जणू तो प्रसन्न दरवळ घरभर पसरवत असे. दळून तयार झालेले मोदकासाठी लागणारे पीठ घासूनपुसून चकचकीत केलेल्या पितळी डब्यात भरून ठेवले की घरच्या स्त्रीयांच्या चेह-यावरील प्रसन्न भाव पाहण्यासारखे असत.      एका बाजूला घरातील पुरुष मंडळींची घराच्या अंतर्गत डागडुजीची कामे सुरू होत. एक एक करत घरातील सर्व ख...